Рақами тамоси марказ 221-30-40 буда, сокинон “ҳангоми дучор шудан бо зӯроварӣ дар оила” метавонанд дар рӯзҳои корӣ аз соати 8:00 то 17:00 тариқи он ба Кумитаи кор бо занон ва оила муроҷиат кунанд.

Кумита тайи ду ҳафтаи охир бо ирсоли паёмак сокинонро аз вуҷуди чунин рақам огоҳ мекунад.

Аз ин ниҳод ба “Азия-Плюс” гуфтанд, ки Маркази тамос аллакай беш аз 2 моҳ аст, фаъолият дорад ва то ин дам мутахассисон бештар ҳузурӣ машварат медоданд.

Ба иттилои масъулин,маркази тамос ҳамчунин рӯзҳои шанбе аз соати 8:00 то 12:00 низ арзу шкиояти сокинонро қабул мекунад. 

Намогирифти паёмаки Кумитаи кор бо занон ва оила.
“Сокинони ҳамчунин метавонанд шахсан ба Кумита ва ё ниҳодҳои он дар минтақаҳо омада, оид ба масъалаҳои маскуншавӣ, пардохт ё таъйини алимент, ҷудошавии зану шавҳар, зӯроварӣ дар оила ва дигар масоили марбут ба оила машварати ҳуқуқиву равонии ройгон гирад”, гуфтанд аз ин ниҳод. 

Мардон низ метавонанд барои машварат ба ин марказ муроҷиат кунанд.

Марказ бо мақсади аз Татбиқи Қонуни ҶТ “Дар бораи пешгирии зӯроварӣ дар оила” ва ҳамоҳангсозии Барномаи давлатӣ оид ба пешгирии зӯроварӣ дар оила таъсис ёфтааст. Ҳадафи кори он расонидани ёрии ҳуқуқӣ, дастгирии занон ва пешгирии хушунату зӯроварӣ дар оила гуфта мешавад.

Қаблан, дар назди Кумитаи кор бо занон ва оила пештар низ телефони боварӣ барои пешгирии зӯроварӣ нисбати занон - 1313 фаъолият мекард, аммо пас аз чанд муддат он аз кор боз монд.

Бодя гуфт, ки хушунату зӯроварӣ дар оила, махсусан нисбати занон аз мушкили доғи рӯз аст. Аз ҷумла, дар 6 моҳи соли 2025 дар кишвар 2 ҳазору 121 амали зӯроварӣ ба қайд гирифта шудааст, ки аз нисбат ба ҳамин давраи соли гузашгта 277 ҳолат зиёд аст.

Бунафша Файзиддинзода, раиси Кумитаи кор бо занон ва оила дар нишасти охири матбуотии худ гуфт, аз ҷумла, дар 6 моҳи соли ҷорӣ 1 ҳазору 763 амали зӯроварӣ нисбати занон содир шудааст, ки аз шашмоҳаи аввали соли пеш 256 ҳолат бештар аст.

Ӯ афзуд, 251 ҳолати зӯроварӣ нисбати мардон содир шуда, назар ба ҳамин давраи соли гузашта 86 ҳолат камтар аст.

Файзиддинзода сабабу омилҳои зӯровариро нофаҳмии байни зану шавҳар, рашки беасос, дахолати шахсони сеюм ва бемории яке аз ҳамсарон гуфт.

“Нисбати мардон аз ҷониби хешу табори занҳо, аз ҷумла, акаю додару падари зан зӯроварӣ мешавад”, - гуфт ӯ.

Дар Telegram, Facebook ва Instagram бо мо бимонед.