Дирӯз, 19-уми октябр дар Боғи ба номи Абулқосим Фирдавсӣ ҷашни Меҳргон бо шукӯҳ таҷлил гардид. Дар ин ҷо намоиш-фурӯши ҳосили ҷамъшудаи деҳқонону кишоварзон ва навъҳои гуногуни хӯрокҳои миллӣ аз тамоми минтақаҳои Тоҷикистон ташкил шуд.

Дар ҳошияи ҷашни Меҳргон ҳамчунин, фестивали занбӯрпарварон, намоиш-фурӯши асал, Иди себу ангур, Иди харбузаву каду, намоиши ғаладонагӣ ва ҷашнвораи “Оши палав” баргузор шуданд.

Деҳқонону кишоварзон ва ангӯрпарварон аз минтақаҳои кишвар маҳсулоти худро то 40% арзонтар аз нархи бозор ба фурӯш гузоштанд.

Дар ҷашнвораи "Оши палов", ошпазҳо аз тамоми минтақаҳои ҷумҳурӣ ширкат намуда, бо истифода аз биринҷи маҳаллӣ, оши минтақаи худро омода карданд. Ба сокинону меҳмонон оши палов ройгон дода шуд.

Ҷашни Меҳргон дар Тоҷикистон аз соли 2009 инҷониб таҷлил мегардад. Меҳргон ҷашни тирамоҳӣ маҳсуб ёфта, ҳамчун рамзи сипосгузорӣ барои неъматҳои табиат ва заҳмати деҳқонон, эҳтиром ба ягонагии инсон ва табиат таҷлил карда мешавад.

Соли гузашта, ҷашни қадимаи деҳқонон – Меҳргон ба рӯйхати мероси фарҳангии ғайримоддии ЮНЕСКО ворид гардид.

Дар Telegram, Facebook ва Instagram бо мо бимонед.