Сокиноне, ки ин шабу рӯз аз Душанбе ба Кӯлобу Фархору Бохтар ва дигар минтақаҳои вилояти Хатлон сафар мекунанд, аз гарон шудани қимати роҳкиро дар арафи иди Рамазон шикоят доранд. Агар чанд рӯз пеш онҳо метавонистанд бо 70-80 сомонӣ аз Душанбе ба Кӯлоб раванд, ҳоло роҳкиро дар ин масир то 130-150 сомонӣ расидааст.

Мусофирон ин афзоишро ба иди Рамазон ва ҷашни Наврӯз рабт дода, мегӯянд, ронандаҳо ба таври сунъӣ нархро гарон мекунанд, вале ронандаҳо баҳона пеш меоранд, ки аз он тараф мусофир нест, ба ин хотир нархро баланд кардаанд.

Шаҳрвандон ба ин иддаои ронандагон бовар надоранд ва мегӯянд, он баҳонае беш нест ва ҳар сол дар арафаи иду ҷашнҳо ронандагон нархи роҳкироро гарон мекунанд. Онҳо мегӯянд, бояд мақомоти дахлдор ин масъаларо санҷида, назорат кунанд.

Мусофироне, ки ба ҷануби кишвар сафар доранд, мегӯянд ду рӯзи охир роҳкиро аз Душанбе ба Кӯлоб аз 150 то 200 сомонӣ, ба Фархор аз 130 то 150 сомонӣ, ба Мир Саид Алии Ҳамадонӣ аз 120 то 150 сомонӣ, ба Восеъ то 150 сомонӣ, ба Бохтар то 80-90 сомонӣ гарон шудааст.

Гузориши моро дар инҷо тамошо кунед:

Роҳкиро ба ҳамаи минтақаҳо гарон шудааст. Сокинон ронандагонро ба беинсофӣ ва худсарона боло бурдани роҳкиро муттаҳам мекунанд. Ронандагон бошад, арзиши маводи сӯхту вазъи роҳ ва бидуни мусофир баргаштан аз дигар самтро баҳона мекунанд. Коршиносон мегӯянд, бозор озод аст ва мақомот наметавонад роҳкироро танзим кунад.

Дар Telegram, Facebook ва Instagram бо мо бимонед.