Волии пешини Балх ва яке аз шахситяҳои таъсиргузор дар сиёсати пешини Афғонистон Ато Муҳаммади Нур дар мусоҳибаи видеоии худ бо “ББС” дар бораи баъзе нуқтаҳои калидӣ оид ба суқути низом дар Афғонистон суҳбат намудааст.

Ӯ, ки аз шаҳри Дубай бо “ББС” суҳбат мекард, аз ҷумла гуфт, ки сенарияи суқути Афғонистон ва тасарруфи “Толибон” (ҳаракати фаъолияташ дар Тоҷикистон маманӯъ) аз имзои Давҳа шурӯъ мешавад.

“Таблиғоти ҳамоҳанг, санҷидашуда, муназзам аз тариқи коршиносони ғарбӣ ва нашрияҳо ва хабаргузории муътабари Ғарб нишонаи он буд, ки як сенарияи танзимшуда аст ва пушти он дӯстони стратегии қавии Афғонистон қарор дошт ва маълум буд ки “Толибон” меоянду Кобулро мегиранду ҳукуматеро ташкил медиҳанд”,- гуфт вай.

Ато Муҳаммад гуфт, ки аз ҷониби раисиҷумҳури пешини Афғонистон ва Шӯрои амнияти ин кишвар фармонӣ таслим шудани ҷанг ба сарбозон дода шуд.

Вай ҳамчунин, хабарҳоро дар бораи он, ки нерӯҳои вижаи Афғонистон ӯро аз Афғонистон берун оварданд, рад кард ва гуфт, ки онҳо худашон пештар аз кишвар фирор карда буданд.

“Ман охирин нафаре будам, ки аз шаҳри Мазори Шариф фирор кардам”,- гуфт Ато Муҳаммади Нур.

Мусоҳибаи муфассалро инҷо бубуинед: