Кумитаи давлатии саноати дифоъи Ӯзбекистон хабарҳо оид ба васлу насби бесарнишинҳои Эрон дар қаламрави худро рад кард. Дар ин бора хабаргузории Podrobno.uz. хабар медиҳад.

Қаблан ровии телевизиони Украина Дмитрий Гордон, иддао карда буд, ки бесарнишинҳои Эрон, ки гуфта мешавад дар муноқишаи низомии Русияву Украина истифода мешавад, дар қаламрави Ӯзбекистон васлу насб мегардад.

"Ӯзбекистон дар якҷоягӣ бо шарикони эронӣ силоҳ ва таҷҳизоти низомӣ тавлид намекунад ва тавлид накардааст", - таъкид кардааст Кумитаи давлатии саноати дифоъ.

Ин ниҳод гуфтааст, ки нашри ин гуна маълумоти тасдиқнашуда ба ҷомеа маълумоти нодуруст мерасонад ва метавонад ба равобити дӯстонаи Ӯзбекистон ва кишварҳои хориҷӣ осеб расонад.

Гуфтан ба маврид аст, ки Дмитрий Гордон Ӯзбекистонро дар тавлиди ҳавопаймоҳои бесарнишини эронӣ барои Русия муттаҳам карда буд. Ӯ ин иддаои худро дар ҷараёни сӯҳбати худ бо миллиардери исроилӣ Леонид Невзлин баён дошт.

Баъдан ба ӯ раҳбари ҳизби “Миллий тикланиш”-и Ӯзбекистон Алишер Қодиров посух дод ва гуфт, ки вазорати корҳои хориҷӣ ва вазорати дифоъ бояд ин ровии украиниро барои узр пурсидан водор намоянд.

Дар Telegram, Facebook, Instagram, OK ва ВК бо мо бимонед.