Нерӯҳои Ҷабҳаи муқовимати миллии Афғонистон дар вилояти Нуристон, ду пойгоҳи Толибонро ба оташ кашида, 13 ҷангҷӯи ин гурӯҳро асир гирифтаанд. Дар ин бора Сибғатуллоҳ Аҳмадӣ, сухангӯи Ҷабҳа хабар медиҳад.

Сибғатуллоҳ Аҳмадӣ дар Твиттер нигоштааст, ки ин ду пойгоҳи Толибон* баъд аз зӯҳри дирӯз, сешанбе, 24-уми январ, дар як ҳамлаи тактикии нерӯҳои ин Ҷабҳа ба оташ кашида шудааст.

Ба гуфтаи ӯ дар ин даргирӣ ба нерӯҳои Ҷабҳаи муқовимати миллии Афғонистон ҳеҷ осебе нарсидааст.

Толибон то кунун дар мавриди ин ҳодиса чизе нагуфтаанд.

Бояд гуфт, ки ин аввалин набарди нерӯҳои Ҷабҳаи муқовимати миллӣ бо Толибон пас аз сармоҳои шадид аст.

Дар даргириҳои қаблии шадид, ки 26-27-уми декабри соли гузашта дар рустоҳои Тағонак, Хаҷ ва Боғдараи Андаробҳои вилояти Бағлон ҷараён гирифт, ҳар ду ҷониб талафоти зиёд доданд.

Дар пайи ин даргириҳо Хайрмуҳаммади Хайрхоҳ Андаробӣ ва Ғозӣ Муродӣ, фармондеҳони нерӯҳои Ҷабҳаи муқовимат дар Андаробҳои Бағлон кушта шуданд.

Он замон рӯзномаи “8-и субҳ” навишт, ки 26-уми декабр, Абдулҳақ Умар, қумандони амнияи Толибон дар Бадахшон низ дар пайи таркиши мошин кушта шуд.

*Дар Тоҷикистон гурӯҳи террористӣ эътироф шудааст

Ҳар он чи дар Афғонистон рух медиҳад, метавонед мустақиман дар сужаи мо - "Афғонистон" бихонед.

Дар Telegram, Facebook, Instagram, OK ва ВК бо мо бимонед.