Созмони “Давлати исломӣ” ё худ ДОИШ масъулияти содир намудани таркишҳоро дар шаҳри Кирмони Эрон дар паҳлӯи қабри генерал Қосим Сулаймонӣ, ки бар асари он зиёда аз 80 нафар ба ҳалокат расиданд, ба дӯш гирифт.
Тавре ки Медуза менависад, дар ин бора Reuters ва Al Arabiya бо истинод ба изҳороти ДОИШ дар Телеграм хабар медиҳанд.
Дар изҳорот гуфта мешавад, амали террористӣ дар оромгоҳ аз ҷониби ду маргталаб, ки камарбандҳояшонро бо маводи тарканда байни издиҳоми мардуми ҷамъомада дар маросими ёдбуди марги Сулаймонӣ тарконданд, содир шудааст.
Дар бораи бар асари амали маргталаб рух додани таркиши аввал ҳадди ақалл қаблан хабаргузории давлатии IRNA низ бо истинод ба манбаи номбарнашуда иттилоъ дода буд.
Ду таркиш дар назди қабри фармондеҳи Неруҳои таъиноти махсуси “Ал-Қудс”-и сипоҳи посдорони инқилоби исломии Эрон генерал Қосим Сулаймонӣ рӯзи 3 январ дар маросими ёдбуди солгарди марги ӯ рух доданд.
Бар асари он дастикам 84 кас ҳалок шуда, зиёда аз 200 нафар осеб диданд. Ин амали террористӣ бузургитарин дар таърихи Эрон аз соли 1979 маҳсуб меёбад.
Шахсони расмии Эрон дар содир намудани ин амал Исроилро гунаҳкор карданд. Лекин, тавре ки The Wall Street Journal бо истинод ба манбаъҳо хабар медиҳад, мақомоти Исроил изҳор доштанд, ки хадамоти махсуси ин кишвар ба таркишҳо даст надоранд.
Дар Департаменти давлатии ИМА низ изҳор доштанд, ки барои даст доштани Исроил дар амали террористӣ ҳеҷ асосе намебинанд ва изҳори ақида карданд, ки таркишҳо дар назди оромгоҳ ба амалҳои террористие монанд мебошанд, ки аз ҷониби ДОИШ содир карда мешаванд.
Қобили зикр аст, ки дар сафорати Эрон дар Душанбе ба хотири гиромидошти номи ҷонбохтагони ҳамлаи террористӣ дар шаҳри Кирмони Эрон аз соати 9:00 то 12:00 ва аз соати 14:00 то 17:00-и рӯзҳои 5 ва 8-уми январ маросими ёдбуд баргузор мешавад.
Руcский