Соли 2023 дар 16 кишвари ҷаҳон 1153 ҳукми эъдом иҷро шудааст, ки ин шумора баландтарин дар нӯҳ соли охир аст. Дар ин бора дар гузориши солонаи Созмони Авфи байналмилал ё “Amnesty International” оид ба татбиқи ҳукмҳои қатл зикр шудааст.

Ба иттилои манбаъ, иҷрои ҳукми эъдом дар соли гузашта 31 дарсад зиёдтар нисбат ба соли 2022 аст. Соли 2022 “Amnesty International” дар бораи иҷрои 883 ҳукми эъдом дар 20 кишвар хабар дода буд.

Муаллифони гузориш зикр мекунанд, ки баландтарин нишондиҳандаи ҳукми эъдом дар соли 2015 аз ҷониби ин созмон ба қайд гирифта шудааст. Соли 2015 дар бораи эъдоми 1634 нафар дар саросари ҷаҳон хабар дода шуда буд. Шумораи ҳукмҳои қатле, ки дар соли 2023 аз сӯи додгоҳҳо содир шудаанд, 20 фоиз зиёд шуда, ба 2428 расидааст.

Дар панҷгонаи кишварҳое, ки дар соли 2023 бештарин ҳукмҳои қатлро иҷро кардаанд  Чин (маълумоти дақиқ номаълум), Эрон (на камтар аз 853 қатл), Арабистони Саудӣ (172), Сомалӣ (на камтар аз 38) ва ИМА (24) шомил шудаанд.

Дар ин давра, 508 қатл барои ҷиноятҳои марбут ба маводи мухаддир сабт шудааст: аз ҳама бештар дар Эрон - 481.

Ба ҳолати охири соли 2023, дар саросари ҷаҳон на камтар аз 27 687 нафар ба ҳукми қатл маҳкум шудаанд.

Дар ҳамин давра, 112 кишвар ҳукми қатлро пурра бекор карданд.

Дар Telegram, Facebook ва Instagram бо мо бимонед.