Дар як ҷаласаи назди раиси вилояти Хатлон Давлатшо Гулмаҳмадов мушкилоти соҳаи тандурустии вилоят мавридӣ баррасӣ қарор гирифтааст.

Бино ба итилои шуъбаи таҳлилию итилоотии дастгоҳи раиси вилоят, дар ин ҷаласа, ки имрӯз 28-уми феврал сурат гирифт, вазири тандурусти ва ҳифзи иҷтимоии кишвар Нусратулло Файзулло, сардорони раёсатҳои соҳаи тандурустӣ, марказҳои саломатӣ, сардухтурони беморхонаҳои вилоятию шаҳрӣ ва навоҳии вилоят ҳузур доштаанд.

Дақиқан кадом мушкилиҳои соҳа мавриди баҳс ва таҳлили раиси вилоят ва вазир қарор гирифтаанд, маълум нест. Дар ин росто шуъбаи итилоотию таҳлилии дастгоҳи раиси вилоят изҳори бехабарӣ намуданд.

Дар ҷаласаи мазкур танҳо роҳбарони  васоити ахбори умуми давлатии вилоят даъват шуда буданд.

Бояд ёдовар шуд, ки раиси вилоят моҳи декабри соли гузашта зимни суханронӣ назди вакилони Маҷлиси вакилони халқи вилояти Хатлон  аз иҷро нашудани барномаи давлатии «Рушди соҳаи тандурустии вилояти Хатлон барои солҳои 2013-2015» изҳори нигаронӣ намуда, зикр карда буд, ки дар соли 2013 барномаи мазкур ҳамаги 36,2% иҷро шудааст.