Дар минтақаи ҷануби ҷумҳурӣ беш аз 1 ҳазор дона шишаҳои маҳсулоти машруботӣ аз фурӯш гирифта шуд.

Тавре ба ОИ «Азия-Плюс» директори бахши «Тоҷикстандарт» дар шаҳри Қӯрғонтеппа Икромиддин Валиев хабар дод, дар ҷараёни санҷиши маҳсулоти ҶСП «Кӯҳсори Хатлон» беш аз 1 ҳазор дона шишаҳои маҳсулоти машруботӣ, ки ба меъёрҳо ҷавобгӯ набуда, қоидаҳои тамғазанӣ, сифат ва ҳаҷми маҳслуот дар он риоя нашудаанд, ошкор гардидаанд. «Тамоми маҳсулот аз фурӯш гирифта шуда, барои ба мутобиқат овардан ба меъёрҳо баргардонида шуд ва нисбати шахсони масъули ҶП «Кӯҳистони Хатлон» санади ҷалб ба ҷазои маъмурӣ таҳия гардид», - гуфт ӯ.

Ба қавли Валиев, бо мақсади кумак ба истеъмолгарон ва соҳибкорон дар ҳамаи бозорҳои минтақа «Тоҷикстандарт» бо як корманд ҳуҷраи алоҳидае боз хоҳад кард. «Дар бозорҳои марказии ноҳияҳои Абдураҳмони Ҷомӣ ва Панҷ мо барои соҳибкорон семинарҳо гузаронида, дар ин бозорҳо кабинети худро кушодем. Ояндаи наздик дар тамоми бозорҳои минтақа кабинетҳои мо боз мегарданд ва харидорону фурӯшандагон зимни пайдо шудани мушкилоте метавонанд ба онҳо муроҷиат намоянд», - афзуд номбурда.