Чанде қабл дар шаҳри Исфара вохӯрии пешвоёни ғайрасмии ҷамоати Ворухи Тоҷикистон ва деҳаи наздимарзии Оқсойи Қирғизистон доир гардид.

Тавре ба ОИ «Азия-Плюс» як манбаъ аз ҳукумати вилояти Суғд хабар дод, ин мулоқот бо ташаббуси мақомоти давлатии ноҳияҳои ҳарду кишвар барпо гардида, дар он аз ҳарду ҷониб 15 нафарӣ пешвоёни ғайрирасмӣ ҳузур доштаанд.

Ба гуфтаи манбаъ, дар вохӯрӣ ёвари президенти Тоҷикистон оид ба масоили амнияти миллӣ Шералӣ Хайруллоев, сардорони Раёсатҳои Вазорати корҳои дохилии вилояти Суғд ва вилояти Ботканд, имомхатибони масҷидҳои намози ҷумъаи шаҳрҳои Исфара ва Ботканд ва намояндагони ҳукуматҳои маҳаллӣ иштирок кардаанд.

«Зимни суханронӣ назди ҳозирин Ш.Хайруллоев зикр кард, ки ҳама гуна мушкилоту масоиле, ки дар қитъаҳои баҳсноки марз ба вуҷуд меоянд, ҳатман дар сатҳи ҳукуматҳо ҳаллу фасл шуда, аҳолӣ ва пешвоёни ғайрирасмӣ бояд ба ҳамзистии осоиштаи мардуми бо ҳам дӯсти тоҷику қирғиз мусоидат кунанд», - иброз дошт манбаъ.