Дар муқоиса бо моҳи январ сатҳи музди меҳнати воқеӣ (бо назардошти тағири индекси нархҳо) дар Тоҷикистон дар моҳи феврал ба андозаи 0,2% коҳиш ёфта, нисбат ба моҳи феврали соли гузашта 15,8% зиёд шуд.

Бино ба маълумоти Агентии омори назди президенти ҶТ, музди меҳнати номиналии моҳонаи кормандони кироя дар моҳи феврал қариб 820 сомонӣ (170 $)-ро ташкил додааст. Музди меҳнати ҳадди ақал дар ҷумҳурӣ ба 250 сомонӣ (52 $) баробар аст.

Ба иттилои манбаъ, музди меҳнати аз ҳама пасттарин дар бахши воқеии иқтисод дар моҳи феврал дар бахши кишоварзӣ, шикору хоҷагии ҷангал – 288 сомонӣ (60 $) ва аз ҳама баландтарин дар саноати истихроҷи кӯҳӣ ва коркарди конҳо – 1 ҳазору 645 сомонӣ (342 $) ба қайд гирифта шудааст.

Гуфта мешавад, дар маҷмӯъ музди меҳнати миёнаи моҳона дар бахши воқеии иқтисод дар моҳи феврал 783 сомонӣ (163 $)-ро ташкил додааст, ки нисбат ба моҳи феврали соли гузашта ба миқдори 25% бештар мебошад.

Дар ҳамин ҳол, дар соҳаи хизматгузорӣ музди меҳнати аз ҳама баландтарин дар бахши миёнаравии молиявӣ – 1 ҳазору 845 сомонӣ (384 $) ба қайд гирифта шудааст. Музди меҳнати миёнаи моҳона дар ин бахш 832 сомонӣ (173 $)-ро ташкил додааст, ки нисбат ба ҳамин давраи соли гузашта ба андозаи 18% зиёдтар аст.