Санаи 15-уми апрел сабти номи довталабон аз рӯи низоми нави дохилшавӣ ба мактабҳои олӣ ба итмом расид, аммо аз 16 то 30 апрели соли 2014 довталабон метавонанд номгӯи ихтисосҳои интихобшуда, муассисаҳои таҳсилоти олии касбӣ, шакл, намуд, забони таҳсил ва дигар маълумоти шахсии худро бо пардохти маблағ дар  филиалҳои БДА “Амонатбонк” ба андозаи 14 сомонӣ иваз намоянд.

Тавре ба «Азия-Плюс» котиби матбуотии Маркази миллии тестӣ Ситора Назарова хабар дод, маълумот дар шабакаи Интернет оид ба дароз кардани муҳлати сабти номи довталабон то 30-юми апрел асоси воқеӣ надошта, ба санаи 15-уми апрел ҳудуди 50 ҳазор нафар довталабон сабти ном шудаанд, ки аз шумори пешбинишуда каме зиёдтар мебошад.

«Бақайдгирии иловагии довталаб танҳо дар нуқтаи бақайдгирие, ки ӯ қаблан дар он сабтином шудааст, ба роҳ монда мешавад. Аз маблағи муқарраргардида танҳо довталабоне, ки падар ва модари онҳо дар қайди ҳаёт нестанд, озод мебошанд», - иброз дошт номбурда.

Қобили зикр аст, ки бақайдгирии довталабон аз 1-уми март то 15-уми апрелсурат гирифта, имтиҳонҳо рӯзҳои 1-12-уми июл баргузор мешаванд.