Дар ниммарафони байнулмилалии V-уми шаҳри Душанбе бахшида ба таҷлили ҷашни Рӯзи пойтахт, ки рӯзи шанбеи ҳафтаи гузашта баргузор шуд, варзишгари украинӣ Роман Романенко пирӯзӣ ба даст овард.

Тавре ба «Азия-Плюс» аз мақомоти шахрдории пойтахт хабар доданд, Романенко дар ниммарафон ба масофаи 22 км миёни мардон ғолиб омада, мақоми дуюмро дар ин мусобиқот Андрей Петров (Ӯзбекистон), сеюмро – Юрий Чечун (Русия), чорумро – Андрей Бризгалов (Русия), панҷумро – Киберес Кембер Квимой (Кения) ва шашумро – Маина Самуэл Вайтака (Кения) касб карданд.

Ба иттилои манбаъ, миёни занон варзишгардухтари Ӯзбекистон Ситора Ҳамидова нахуст ба марра расида, зинаҳои минбаъдаро Юлия Чиженок (Русия), Екатерина Фатеева (Русия), Марина Хмелевская (Ӯзбекистон), Наталя Соловева (Русия) ва Мария Коробитская (Қирғизистон) ишғол намудаанд.

Ёдрас мекунем, ки барои дар сатҳи зарурӣ баргузор кардани ниммарафони байнулмилалӣ аз буҷети пойтахт беш аз 220 ҳазор сомонӣ  (зиёда аз 40 ҳазор $) маблағ ҷудо гардид. Ғолибони ниммарафон ҳам миёни мардону ҳам миёни занон бо 3,5 ҳазор $, соҳибони зинаи дуюм – 3 ҳазор $, сеюм – 2,5 ҳазор $, чорум – 2 ҳазор $, панҷум – 1,8 ҳазор ва шашум бо 1,5 ҳазор $ мукофотпулӣ сарфароз гардонида шуданд.