Агентии стандартизатсия, метрология, сертификатсия ва нозироти савдои назди ҳукумати Тоҷикистон (Тоҷикстандарт) озмуни навбатии « Маҳсулот ва хизматрасонии беҳтарин дар Ҷумҳурии Тоҷикистон» дар соли 2014-ро эълон кард.

Бино ба иттилои хадамоти ммтбуоти Агентӣ, дар озмун корхонаву ташкилотҳои тамоми шакли молиякият ва соҳибкорони инфиродӣ иштирок карда метавонанд.

«Ҳадафи аслии озмун татбиқи Барномаи давлатии сифат барои солҳои 2013-2015, дастгирии соҳибкорони ватанӣ, ки маҳсулоти рақобатпазир истеҳсол мекунанд, мусоидат ба таъмини бозори истеъмолӣ бо маҳсулоти баландсифат ва хизматрасониҳои рақобатпазир ва муаррифии корхонаҳои беҳтарини ватанӣ мебошад», - иттилоъ медиҳад хадамоти матбуоти Агентӣ.

Гуфта мешавад, озмун аз рӯи номинатсияҳои маҳсулоти хӯрокворӣ, маҳсулоти саноатӣ ва маҳсулоти ҳунарҳои халқӣ, маҳсулоти таъиноти истеҳсолию техникӣ ва ҳамчунин хизматрасонии соҳаи савдо гузаронида мешавад.

Зимнан зикр мегардад, ки дархостҳо барои иштирок дар озмун бо бастаи зарурии ҳуҷҷатҳо то 10-уми майи соли ҷорӣ қабул карда мешаванд.