Чанде қабл раиси шаҳри Исфара Даврон Зоҳидзода ба сохтмони бинои нави муосир барои мактаб-интернати махсуси кӯдакони биноиашон норасо ҳусни оғоз бахшид.

Котиби матбуотии раиси шаҳри Исфара Иқбол Тешаев тариқи телефон ба «Азия-Плюс» дар ин робита иттилоъ дод, ки сохтмони бинои нави мактаб-интернат ба маблағи беш аз 600 ҳазор сомонӣ комилан аз ҷониби ҶДММ «Корхонаи кимиёи»-и шаҳр маблағгузорӣ мешавад. «Мавриди истифода қарор додани иншооти мазкур 1-уми сентябри соли ҷорӣ ба нақша гирифта шудааст», - иброз дошт ӯ.

Ба гуфтаи Тешаев, айни замон дар мактаб-интернати мазкур зиёда аз 80 нафар тарбиятгирандагон аз бисёр ноҳияҳои вилояти Суғд иқомату таҳсил мекунанд.