Имрӯз дар шаҳри Қӯрғонтеппа ба собиқадорони Ҷанги Бузурги Ватанӣ (ҶБВ) кумакпулӣ супурда шуд.

Чорабинии мазкур дар ҳукумати шаҳри Қӯрғонтеппа доир гардида, намояндаи Дастгоҳи президент Одинашоҳ Вализода ба ҳар кадоме аз 15 нафар собиқадорони ҶБВ дар ҳаҷми 1 ҳазор сомонигӣ кумакпулӣ супурд.

Дар навбати худ раиси Шӯрои собиқадорони ҶБВ ва меҳнати шаҳри Қӯрғонтеппа Абдувоҳид Шодиев барои таваҷҷуҳи хосса ба онҳо ба президенти кишвар ва ҳукумати ҷумҳурӣ миннатдорӣ изҳор кард. «Дар посух ба ин ғамхорӣ мо тамоми нерӯямонро барои тарбияи насли наврас дар рӯҳияи ватандӯстӣ равона хоҳем кард», - гуфт ӯ.

Муовини раиси шаҳри Қӯрғонтеппа Солеҳамо Қосимова ба хабарнигори «Азия-Плюс» дар ин робита зикр кард, ки дар остонаи таҷлили ҷашни Рӯзи Ғалаба ба иштирокчиёни ҶБВ ва собиқадорон аз ҷониби ҳукумати шаҳр низ кумакпулӣ дода мешавад.