Субҳи рӯзи 9-уми май сатҳи об дар сойи Тебалайи Кӯлоб аз меъёр хеле зиёд шуда, ду садди муҳофизатиро рахна кард.

Тавре ба «Азия-Плюс» раиси ҷамоати Кӯлоб Салим Бобохонов хабар дод, лозим омадааст, ки иштирок дар чорабиниҳои ҷашни Иди Ғалабаро мавқуф гузошта, «рӯзи мубориза бо оқибатҳои офати табиӣ эълон карда шавад».

Ба гуфтаи ӯ, қувваи обу лойқа то ҳадде пурзӯр будааст, ки плитаҳои муҳофизатии оҳану бетонии 3-8 тоннагӣ чун картон рахна шудаанд.

«Вале ҳамин плитахо суръати маҷрои обу лойқаро паст намуда, аз ин рӯ, мардум ва манзилҳои зист осеб надиданд. Танҳо дар баъзе ҷойҳо соҳил шуста шуда, як майдони кишти гандум низ зарар дид», - иброз дошт ӯ.

Ба қавли номбурда, таҳти раҳбарии ситоди шаҳрии ҲФ ва МГ бо ҷалби техникаи махсуси корхонаҳои гуногуни шаҳр дарҳол корҳои барқарор сохтани саддҳои муҳофизатӣ оғоз гардида, ширкати «Фароз» ба ҷойи ҳодиса як экскаватори пуриқтидорро сафарбар намудааст.