Маркази исломии Тоҷикистон барои имомхатибони кишвар давраҳои омӯзишӣ барпо мекунад.

Тавре ба «Азия-Плюс» раиси Шӯрои уламои Маркази исломӣ Саидмукаррам Абдуқодирзода хабар дод, нахуст имомхатибони масҷидҳои пойтахт ба давраҳои омӯзишӣ фаро гирифта мешаванд. «Гурӯҳҳо аз 25-30 нафар иборат буда, машғулиятҳо муддати як ҳафта идома меёбанд», - иброз дошт ӯ.

Ба қавли ӯ, мавзӯъҳои машғулиятҳо нозукиҳои ақида ва мазҳаби Абӯ Ҳанифаро дар бар мегиранд, то ки имомхатибон аз мазҳаби худ хубтар огоҳ гардида, аз китобҳои мутобиқ ба мазҳаби ҳанафӣ истифода кунанд.

Дар ҳамин ҳол, айни замон санҷиш (аттестатсия)-и солонаи имомхатибон низ ҷараён дорад. Ба гуфтаи сухангӯи Кумитаи дин ва танзими анъана ва ҷашну маросимҳои миллии назди ҳукумати ҶТ, санҷиши ҳамасолаи имомхатибон барои хулосагирӣ аз сатҳи касбии онҳо зарур аст. «Дар масҷид ҳазорон нафар ибодат мекунанд, аз ин рӯ, имомхатиб бояд шахси босаводу огоҳ бошад», - зикр кард ӯ.

Зимнан зикр гардид, ки Кумитаи мазкур дастур барои имомхатибон ба нашр расонидааст, ки аз 50 мавзӯъ иборат буда, имомхатибон метавонанд онро дар маъвизаҳояшон истифода кунанд.