ҶСК «Межрегиональный транзиттелеком» (МТТ) дар бораи роҳандозии оператори нави виртуалии алоқаи мобилӣ Aiva Mobile дар реҷаи озмоишӣ хабар дод, ки барои муҳоҷирон аз кишварҳои ИДМ, аксаран аз Осиёи Марказӣ пешбинӣ шудааст.

Бино ба иттилои Газета.Ru, шарики МТТ ширкати МТС шудааст, ки барои лоиҳа зербинои дастрасии радиоии мобилиро пешниҳод намудааст. Кишвари аввалине, ки дар он Aiva Mobile роҳандозӣ шуд, Тоҷикистон аст. Дар як SIM-корти Aiva Mobile муштарӣ дар як вақт бо ду рақами фаъол – тоҷикӣ ва русӣ таъмин мегардад. Аз ҳарду рақам метавон ба ҳар кадоме аз кишварҳо занг зад ё зангро қабул кард.

«Аудиторияи ҳадафноки Aiva Mobile ҷамоатҳои этникии кишварҳои пасошӯравӣ, дар навбати аввал кишварҳои Осиёи Марказӣ мебошанд, ки намояндагони онҳо дар Русия машғули коранд. Нахустин кишваре, ки оператори нав дар он бо мақсади тиҷорат мавриди истифода қарор мегирад, Тоҷикистон мебошад», - хабар медиҳад бо истинод ба хадамоти матбуотии ММТ портали иттилоотии «Россия для всех».

Бино ба маълумоти Хадамоти федералии муҳоҷирати Русия, шумори муҳоҷирони кории тоҷик дар Русия 1,1 млн. нафарро ташкил медиҳад. Тибқи маълумоти Вазорати меҳнат, муҳоҷират ва шуғли аҳолии Тоҷикистон, соли гузашта 800 ҳазор нафар шаҳрвандони ҷумҳурӣ муҳоҷиратро ихтиёр кардаанд. Аз шумори умумии муҳоҷирони тоҷик дар хориҷи кишвар 90%-ашон дар Русия қарор доранд.