Хадамоти консулгарии сафоратхонаи Тоҷикистон дар Русия се нафар кӯдакони хурдсоли тоҷикро, ки қаблан аз тарбияи онҳо падару модаронашон рӯй гардонида буданд, аз Маскав ба Душанбе фиристод.

Тавре ба «Азия-Плюс» корманди намояндагии дипломатии тоҷикистон дар Маскав Ҳабибулло Каримов хабар дод, рӯзи чоршанбе тариқи хатсайри ҳавоии Маскав – Душанбе Оксана Давлатшоеваи 1,5-сола, Умар Исматуллоеви 1-сола ва Маҳина Мирзойироваи 3-сола ба ватан фиристода шуданд.

«Инҳо кӯдаконе мебошанд, ки волидайнашон аз тарбияи онҳо рӯй гардонидаанд. Ба туфайли гуфтушуниди тӯлонии Консулгарии аафорат бо мақомоти дахлдори Русия онҳо ба ватан баргардонида шуданд», - гуфт Каримов.

Ба қавли номбурда, то ин дам ин кӯдакон дар хонаҳои кӯдакони шаҳри Маскав ба нигоҳубину тарбия фаро гирифта шуда буданд.

Бино ба маълумоти Хадамоти федуралии муҳоҷирати Русия, ба санаи 4-уми майи соли равон ҳудуди 1 млн. 138 ҳазор нафар шаҳрвандони Тоҷикистон дар қаламрави Русия қарор доштанд, ки 962,5 ҳазор нафарашонро мардон ва беш аз 175,4 ҳазор нафарашонро занон ташкил медиҳанд.