Рӯзи 24-уми май назди сафоратхонаи Тоҷикистон дар Бишкек «алайҳи зуҳури зӯроварии дар Хоруғ ҷойдошта» аксияи осоиштаи эътирозии зодагони Вилояти Мухтори Кӯҳистони Бадахшон доир мегардад.

Бино ба иттилои созмондиҳандагони гирдиҳамойӣ, барои иштирок дар ин аксия намояндагони гурӯҳҳои гуногуни этникии Бадахшон гирдиҳам омада, баргузории ҷамъомад бо ҳукуматдорони шаҳри Бишкек мувофиқа шудааст.

Созмондиҳандагони чорабинӣ бар ин назаранд, ки сабаби рух додани чунин  ҳодисаҳо оқибати ҳалношуда боқӣ мондани мушкилоти иҷтимоиву иқтисодӣ дар вилоят ва нишони нобоварии амиқи аҳолии минтақа ба ҳукумати марказӣ ва бахусус мақомоти интизомӣ мебошад.

Гуфта мешавад, дар гирдиҳамойӣ ба сафири Тоҷикистон дар Қирғизистон Олим Раҳимов супурдани муроҷиатнома дар назар аст, ки он аз пешниҳодоти мушаххас ба ҳукумати Тоҷикистон ҷиҳати ҳалли мушкилоти вилоят иборат аст.

Ёдрас мекунем, ки дар робита ба рӯйдодҳои фоҷебаори рӯзи 21-уми май дар шаҳри Хоруғ ҷомеаи шаҳрвандии ВМКБ изҳорот интишор намуда , дар он ин рӯйдодҳоро иқдоми тарҳрезишудаи мақомоти интизомӣ арзёбӣ кард.