Бар асари боришоти шадид дар ҷумҳурӣ тамоми ситодҳои Кумитаи ҳолатҳои фавқулода ва мудофиаи гражданӣ (КҲФ ва МГ)-и Тоҷикистон дар ҳолати омодабоши комил қарор дошта, бо реҷаи пурзӯр фаъолият доранд.

Бино ба иттилои КҲФ ва МГ Тоҷикистон, имрӯз аз ҳама бештар дар минтақаи шаҳри Норак боришоти шадид сурат гирифта, дар вилояти Хатлон хатари фаромадани селҳо вуҷуд дорад.

«Тамоми ситодҳои КҲФ дар ҳолати омодабоши доимӣ қарор дошта, ба дастгоҳи марказии кумита то ин дам дар бораи харобиҳову талафоти ҷонӣ бар асари офати табиӣ маълумот ворид нагардидааст», - гуфтанд дар Кумита.

Қобили зикр аст, ки дар натиҷаи боришоди шадид дар шаҳри Душанбе роҳҳо беҳад пуроб гардида, ба ҳаракати нақлиёт монеъа эҷод гардид.

Бино ба маълумоти Муассисаи обуҳавошиносии ҷумҳурӣ, обуҳавои ноустувор дар Тоҷикистон то рӯзҳои 1-2-юми июн боқӣ мемонад. Боронҳои кӯтоҳмуддат (баъзан шадид) меборанд. Дар ноҳияҳои кӯҳистон ва доманакӯҳ хатари селфароӣ ва дар дарёҳо болоравии сатҳи об дар назар аст.