Шумораи нахусти маҷаллаи Кумита оид ба корҳои дин, танзими анъана ва ҷашну маросимҳои миллии назди ҳукумати ҶТ бо номи «Дин ва ҷомеа» нашр шуд.

Котиби матбуотии Кумита Афшин Муқим ба «Азия-Плюс» дар ин робита иттилоъ дод, ки маҷалла бо теъдоди 5 ҳазор нусха ба табъ расида, сардабири маҷалла раиси Кумита Абдураҳим Холиқзода аст. Арзиши маҷалла ҳудуди 10 сомониро ташкил медиҳад.

Дар муқоваи шумораи нахустини маҷалла акси президенти кишвар ва ҳамчунин аксҳои вохӯрии ӯ бо аҳолӣ чоп шудаанд.

Ба гуфтаи муҳаррири маҷалла Мавлон Мухторов, дар Тоҷикистон то ҳанӯз маҷаллаи махсуси инъикоскунандаи танҳо мушкилоти марбут ба дин вуҷуд надошт. «Дин ва ҷомеа» маҳз ҳамин гуна маҷалла мешавад. Тамоми мушкилоти марбут ба дин, фиқҳ ва баҳсҳо миёни намояндагони дин дар маҷалла муфассал инъикос карда мешаванд», - гуфт ӯ.

Зимнан зикр гардид, ки идораи маҷалла ҳамчунин ба қабули саволҳои хонандагон омода буда, ба ин саволҳо олимон ва коршиносон посух хоҳанд гуфт. «Хонандагон метавонанд мақолаҳои худро низ барои интишор дар маҷалла ирсол кунанд», - афзуд номбурда.

Қобили зикр аст, ки «Дин ва ҷомеа» аввалин маҷаллаи дорои мундариҷаи динӣ дар Тоҷикистон набуда, Ҳизби наҳзати исломии Тоҷикистон бо номи «Сафинаи умед» ва портали динии «Рӯзгор» низ ба ин монанд маҷаллаҳои худро интишор мекунанд.