Ба яке аз манзилҳои 4-ошёнаи пойтахт крани сохтмонӣ чаппа шуд. Дар ин бора ба «Азия-Плюс» тариқи телефон шоҳидони воқеъа хабар доданд.

Ба гуфтаи онҳо, тахминан соати 14-30-и рӯз як крани начандон бузургҳаҷм ба болои яке аз манзилҳои 4-ошёнаи воқеъ дар кӯчаи Ҷаббор Расулов афтодааст.

Дар ситоди Кумитаи ҳолатҳои фавқулодаи шаҳри Душанбе тариқи телефон ин маълумотро тасдиқ накарданд. Хабарнигорони «Азия-Плюс» ба ҷойи ҳодиса ҳозир шуда, боварӣ ҳосил карданд, ки чунин ҳодиса воқеъан ҳам рух додааст. Крани сохтмонии начандон бузурги воқеъ дар майдони сохтмони хонаи баландошёна якпаҳлӯ ба бинои чорошёна афтода, қисмате аз боми хонаро хароб кардааст.

Бино ба маълумоти шоҳидони воқеъа, аз ин ҳодиса касе осеб надидааст. Дар ҳамин ҳол, зимни таҳияи маълумоти мазкур кран дар ҳамон ҳолати пешинааш қарор дошта, симтанобаш (трос) қариб то ба замин мерасид. Бинокорон изҳор карданд, ки онҳо КҲФ-ро огоҳ кардаанд, вале онҳо то ҳол ҳозир нашуда, сардори сохтмонро ба прокуратура даъват намудаанд.