Хабарнигори газетаи шаҳрии «Набзи Қӯрғонтеппа» Ашӯргул Солеҳова аз болои сардори раёсати маорифи вилояти Хатлон Хоналӣ Қурбонзода ба раиси вилояти Хатлон Давлатшо Гулмаҳмадов шикоят бурд.

Ба гуфтаи Ашӯргул Солеҳова, сардори раёсати маорифи вилоят чандин маротиба ҳангоми иҷрои вазифаҳои хизматиаш ӯро мавриди таҳқир қарор додааст.

«Ахиран ӯ маро дар маҷлиси тантанавӣ бахшида ба «Занги камолот» дар литсейи «Ориёно» ва қаблан дар худи раёсат таҳқир карда гуфта буд, ки ба афту андомат нигоҳ карда пай бурдан мумкин аст, ки ту рӯзноманигорӣ, вале ман модари се фарзанд буда, оддӣ либос ба бар мекунам, зеро маошам имкон намедиҳад, ки сарулибоси гаронбаҳо бихарам», - мегӯяд Солеҳова.

Ба қавли ӯ, агар раиси вилоят Давлатшо Гулмаҳмадов чораҳои дахлдор наандешад, ба мақомоти дигар шикоят хоҳад кард.

Ашӯргул Солеҳова бо тахаллуси адабии Шабафрӯз муаллифи се маҷмӯаи ашъор – «Гули бодом», «Қисмати миллатам» ва «Пайғоми Хуросон» аст. Соли 2013 ӯ аз ҷониби Кумитаи ҷавонон, варзиш ва сайёҳии назди ҳукумати ҶТ ба унвони беҳтарин ходими адабӣ сазовор дониста шуд.