Падару модари писарбача бо номи Алиҷонро, ки рӯзи 13-уми июн дар яке аз истгоҳҳои паҳлӯи Сирки пойтахт яккаву танҳо дарёфт шуда буд, барои бемасъулиятӣ ҷарима мекунанд.

Аз Шуъбаи ВКД Тоҷикистон дар ноҳияи Фирдавсии пойтахт ба «Азия-Плюс» дар ин робита иттилоъ доданд, ки волидайни Алиҷон мутобиқи муқаррароти Қонуни ҶТ «Дар бораи масъулияти падару модар дар таълиму тарбияи фарзанд» ба ҷавобгарӣ кашида шуда, ҷаримабандӣ мешаванд.

«Ин парванда ба суди ноҳияи Фирдавсӣ ирсол гардида, бо қарори суд ҷарима ситонида мешавад. Ҳаҷми маблағи ҷаримаро мо намедонем. Кӯдакро шоми рӯзи 13-уми июн падараш Изззатулло Неъматов бо худ бурд. Ба гуфтаи ӯ, кӯдак бенигоҳубин гузошта шуда будааст», - шарҳ доданд дар Шуъбаи ВКД ҶТ дар ноҳияи Фирдавсӣ.

Ёдрас мекунем, ки нимаи дуюми рӯзи 13-уми июн дар истгоҳи яке аз кӯчаҳои назди Сирки давлатии пойтахт раҳгузарон ба кӯдаки тақрибан 3-4-солае дучор омаданд, ки яккаву танҳо бе калонсолон дар кӯча мегашт. Кӯдак ба ҷуз номи худ чизи дигаре дар бораи худ гуфта наметавонист.