Дар шаҳри Хуҷанд ярмаркаи минтақавии савдо таҳти унвони «Суғд-2014» ба кор оғоз намуд.

Бино ба иттилои хадамоти матбуоти раиси вилояти Суғд, ин ярмарка бо мақсади муаррифии маҳсулоти соҳаҳои саноату кишоварзии вилоят ва ба роҳ мондани ҳамкориҳои тарафайн бо соҳибкорону ширкатҳои давлатҳои хориҷӣ сурат мегирад.

Ба иттилои манбаъ, дар ярмарка беш аз 60 корхонаи саноатии вилоят маҳсулоти хешро аз қабили ҳунарҳои анъанавии дастӣ дар мисоли сӯзанидӯзию гилембофӣ, кордсозию тоқидӯзӣ, сабадбофӣ, масолеҳи сохтмонӣ, либосҳо, нӯшокиҳои ташнашикан, таҷҳизоти электронӣ, дастовардҳои соҳаи алоқа ва бонкҳо, шириниҳо, маҳсулоти ширию гуштӣ, дару тирезаҳои пластикӣ, намунаи сабзавоту полезиҳо ва меваҷот пешниҳоди меҳмонон ва сокинони вилоят мегардонанд.

Зикр мегардад, ки ба ярмаркаи мазкур намояндагони беш аз 30 давлати ҷаҳон аз қабили Росия, Қазоқистон, Қирғизистон, Афғонистону Эрон, Покистон, Белгия, Олмону Латвия ва ғайра даъват шудаанд.

Гуфта мешавад, дар доираи ин ярмарка чорабиниҳои мухталиф, аз ҷумла форуми байналмилалӣ бо номи «Қудрати воридотӣ ва тиҷорати байналмилалӣ», вохӯрии ширкатҳои тиҷоратии ватанию хориҷӣ, қабули меморандум ва созишномаҳои тарафайни ҳамкорӣ ва ҷамъбасти озмуни “Маҳсулоти беҳтарини соли 2014” ба нақша гирифта шудаанд.