Раҳбарияти Ҳизби наҳзати исломии Тоҷикистон амали террористиеро, ки санаи 16-уми декабр дар яке аз мактабҳои шаҳри Пешовари Покистон аз ҷониби ҷангиёни ҳаракати Толибон сурат гирифта, ба ҳалокати беш аз 150 нафар омӯзгорону толибилмон ва ҷароҳат бардоштани даҳҳо нафари дигар боис гардид, шадидан маҳкум намуд.

Дар баёнияи интишоршудаи ҲНИТ дар ин робита зикр мегардад, ки ҲНИТ  ин амали террористиро ваҳшиёна ва ғайриинсонӣ медонад. «Анҷоми ин гуна ҳамалот, ки мунҷар ба қатлу куштори мардуми бегуноҳ ва махсусан занону кӯдакон мегардад, ягон иртибот ба дини мубини Ислом надорад», - изҳор мегардад дар баёния. 

 Гуфта мешавад,  гурӯҳ ва доираҳое, ки бо роҳи суистифода аз таълимоти динӣ дар ҷаҳони муосир даъват ба хушунат ва зӯроварӣ намуда, мехоҳанд ба хостаҳои худ бирасанд, бояд донанд, ки ин гуна услуб ва шеваҳо дур аз меъёрҳои исломӣ ва инсонӣ ҳастанд, ки чеҳраи Исломи поку таҳаммулпазир ва мусолиматомезро дар назари мардуми дунё хатчадор менамояд.

«Роҳбарияти Ҳизби Наҳзати Исломии Тоҷикистон бо маҳкум кардани ин амали ваҳшиёна ба наздикону пайвадони шуҳадо, ба мардуми шарифи Покистон ва ҳукумати ин кишвар ҳамдардӣ ва ҳамдилии худро изҳор медорад», - омадааст дар фарҷоми баёния.