Шумори номзадҳо ба 22 курсии палатаи поёнии парлумон аз ҳизбҳои сиёсӣ то имуз ба 125 нафар расид. Дар ин бора ба «Азия-Плюс» як манбаъ аз КМИР Тоҷикистон хабар дод.

Бино ба иттилои манбаъ, то субҳи имрӯз аллакай 6 ҳизби сиёсии кишвар ба КМИР рӯйхатҳои ҳизбии худро пешниҳод намуданд.

Хотиррасон шуд, ки ба рӯйхати Ҳизби халқии демократии Тоҷикистон – 28, Ҳизби наҳзати исломии Тоҷикистон – 28, Ҳизби ислоҳоти иқтисодии Тоҷикистон – 6, Ҳизби сотсиалистии Тоҷикистон – 7, Ҳизби демократии Тоҷикистон – 4 ва Ҳизби аграрии Тоҷикистон – 15 нафар номзадҳо шомил шудаанд.

Зимнан зикр гардид, ки рӯзи шанбеи ҳафтаи сипаришуда боз ду ҳизби дигар – Ҳизби коммунист ва Ҳизби сотсиал-демократии Тоҷикистон низ анҷумани пешазинтихоботии худро доир намуда, рӯйхатҳо ҳизбиашонро тасдиқ карданд. Ҳамин тариқ, тибқи рӯйхати ҳизбии ҲСДТ – 22 номзад ва ҲКТ – 15 номзад ба вакилӣ пешбарӣ гардиданд.

Ёдрас мекунем, ки палатаи поёнии парлумони Тоҷикистон аз 63 нафар вакилон иборат аст, ки 22 нафар тибқи рӯйхатҳои ҳизбӣ аз ҳавзаи ягонаи умумиҷумҳуриявӣ ва 41 нафар вакилон аз ҳавзаҳои якмандатӣ интихоб карда мешаванд.