Имрӯз, 30-юми декабр маъракаи пешбарии номзадҳо ба вакилӣ дар палатаи поёнии парлумон аз ҳавзаҳои интихоботии якмандатӣ оғоз гардид.

Роҳбари дастгоҳи Комиссияи марказии интихобот ва раъйпурсӣ (КМИР)-и Тоҷикистон Абдуманнон Додозода ба «Азия-Плюс» дар ин робита иттилоъ дод, ки маъракаи пешбарии номзадҳо ба вакилӣ дар палатаи поёнии парлумон дар 41 ҳавзаи якмандатӣ 15-уми январ ба итмом мерасад. «Аз 15 то 31-уми январ КМИР номзадҳо ба вакилиро расман ба қайд мегирад», - иброз дошт номбурда.

Ёдрас мекунем, ки 8 ҳизби сиёсии ҷумҳурӣ дар анҷуманҳои пешазинтихоботии худ ба 22 курсии вакилӣ дар палатаи поёнии парлумон тибқи рӯйхатҳои ҳизбӣ аз ҳавзаи ягонаи умумиҷумҳуриявӣ 125 нафарро пешбарӣ намуданд.

Палатаи поёнии парлумони Тоҷикистон аз 63 нафар вакилон иборат аст, ки 22 нафар тибқи рӯйхатҳои ҳизбӣ аз ҳавзаи ягонаи умумиҷумҳуриявӣ ва 41 нафар вакилон аз ҳавзаҳои якмандатӣ интихоб карда мешаванд.