Президенти Қирғизистон Алмазбек Отамбоев қонун дар бораи тасдиқи Созишнома миёни ҳукуматҳои Қирғизистону Тоҷикистон дар бораи сохтмони ду пул ва қитъаҳои роҳи мошингард миёни марзҳои давлатии ҳарду кишварро, ки оид ба он санаи 31-уми марти соли 2014 дар Душанбе тавофуқ ҳосил шуда буд, ба имзо расонид. Дар ин бора АКИпресс хабар медиҳад.

Бино ба иттилои агентии мазкур, президенти кишвари ҳамсоя ба Вазорати корҳои хориҷии кишвараш дастур додааст, ки ҷониби Тоҷикистонро дар бораи аз ҷониби Қирғизистон ба иҷро расидани расмиёти дохилидавлатии зарурӣ барои мавриди амал қарор гирифтани созишномаи мазкур огоҳ созад. Қонун аз санаи интишор шуданаш ҳукми қонунӣ мегирад.

Дар ҳамин ҳол, Отамбоев рӯзи 27-уми декабр зимни мулоқот бо рӯзноманигорон дар ин робита изҳор намудааст, ки пас аз вохӯрии ӯ бо президенти Тоҷикистон Эмомалӣ Раҳмон ба эътидол омадани вазъ дар марзи Тоҷикистону Қирғизистон оғоз гардид. Дар ин бора Вечерний Бишкек хабар медиҳад.

«Вазъи имрӯзу аввали сол куллан фарқ дорад. Агар дар нимсолаи аввал мо ҳатто марзҳоро мебастем, пас аз вохӯрии мо бо Эмомалӣ Раҳмон дар моҳи сентябр ва суҳбату ошкор ҳамаи масъалҳо ҳаллу фасл шуданд. Ҳатто сохтмони пулҳое, ки сари онҳо мо 4 сол баҳс доштем, дар ниҳояти кор шурӯъ шуд», - гуфтааст президенти Қирғизистон.