Президенти Тоҷикистон Эмомалӣ Раҳмон дар робита ба ҳамлаи ғаддоронаи террористӣ дар Париж ба идораи ҳайати таҳририяи маҷаллаи “Шарли Эбдо”, ки 12 нафар кушта ба ҷой гузошт, ба унвони президенти Ҷумҳурии Фаронса Франсуа Жерар Жорж Олланд барқияи тасаллият ирсол намуд.

Бино ба иттилои хадамоти матбуоти сарвари давлат, дар барқияи Эмомалӣ Раҳмон дар ин робита зикр мегардад, ки «ин амали ғайриинсонӣ ҳамаи моро бори дигар ҳушдор медиҳад: башарият имрӯз бо душмани умумие рӯ бу рӯст, ки хориҷ аз чаҳорчӯби ҳар гуна қоидаҳои зиндагии инсонист.

«Муборизаи дастаҷамъонаи беамон бар зидди ин “вабои аср” бояд ҳамаи моро муттаҳид созад. Тоҷикистон, ки бо Фаронса дар ин ҷода ҳамеша ҳамкориҳои хубу созанда дошт, таъкидан иброз медорад, ки дар амри решакан намудани ин падидаи фалокатбор бо Фаронса хоҳад буд», - омадааст дар барқия.

Сарвари давлати Тоҷикистон бо изҳори таъзия ва тасаллияти самимӣ ба тамоми мардуми дӯсти Фаронса ва ба наздикони фавтидагон ҳамдардии амиқ изҳор намуда, ба маҷрӯҳшудагон шифои оҷил ва комил орзу мекунад.