Рӯзи 8-уми январи соли равон муовини вазири корҳои хориҷии Тоҷикистон Парвиз Давлатзода сафири Ӯзбекистон дар  Тоҷикистон Шоқосим Шоисломовро ба ҳузур пазируфт.

Бино ба иттилои Вазорати корҳои хориҷии ҶТ, зимни мулоқоте, ки дар фазои анъанавии тафоҳум ва созанда доир шуд, масоили мубрами дуҷониба ва минтақавӣ мавриди муҳокима қарор гирифта, ба татбиқи амалии қарордодҳои сарони ду давлат, ки дар мулоқоти онҳо дар ҳошияи Саммити СҲШ дар Душанбе моҳи сентябри соли сипаришуда ҳосил шуда буданд, таваҷҷуҳи хоса зоҳир карда шуд.

Гуфта мешавад, ҷонибҳо ба манзури боз ҳам бештар вусъат бахшидани равобити байни ду кишвари ҳамсоя андешидани як зумра тадбирҳоро дар ин самт мувофиқи мақсад донистанд.

Ба иттилои манбаъ, худи ҳамин рӯз Парвиз Давлатзода сафири Қазоқистон дар Тоҷикистон Агибай Смагуловро  бо хоҳиши ӯ ба ҳузур пазируфта, зимни мулоқот атрофи масоили мубрами дуҷониба ва минтақавӣ мубодилаи афкор сурат гирифт.

Зикр мегардад, ки тарафҳо ба сатҳи имрӯзаи муносибатҳои дӯстонаи ду кишвар баҳои баланд дода, зарурати андешидани тадбирҳои мушаххасро ҷиҳати амалисозии чорабиниҳои дар соли 2015 ба нақша гирифташуда, бахусус омодагӣ ба сафари расмии Президенти Қазоқистон Нурсултон Назарбоев ба Тоҷикистон ва ҷаласаи навбатии Комиссияи муштараки байниҳукуматии Тоҷикистону Қазоқистон оид ба ҳамкориҳои  иқтисодӣ таъкид сохтанд.