Дар конфронсҳои бахшҳои Ҳизби наҳзати исломии Тоҷикистон, ки рӯзҳои истироҳати ҳафтаи гузашта доир гардиданд, аз ҳавзаҳои якмандатии интихоботӣ 5 нафар фаъолони ҳизб номзад ба вакилӣ дар палатаи поёнии парлумон пешбарӣ шуданд.

Бино ба иттилои сомонаи расмии ҲНИТ, конфронси интихоботии бахшҳои ҲНИТ дар ноҳияҳои Файзобод, Нуробод ва Ваҳдат оид ба пешбарии номзад ба вакилии Маҷлиси намояндагон аз ҳавзаи Файзобод №11 баргузор гардида, номзадии Раҳматуллоҳи Раҷаб, раиси шуъбаи ҲНИТ дар Навоҳии тобеъи марказ ба вакилии МН пешниҳод гардид.

Бахши ҲНИТ дар ноҳияи Фирдавсии пойтахт мушовири раиси ҳизб оид ба ҳуқуқ Зарафо Хӯҷаеваро номзад ба вакилӣ дар палатаи поёнии парлумон пешбарӣ намуд.

Энергетики касбӣ Нуъмон Шарипов аз ҳавзаи интихоботии Исфара ва Қавӣ Файзиев аз ноҳияи Панҷакент низ номзадҳои ҲНИТ ба вакилӣ дар парлумон пешбарӣ шуданд.

Конфронси муштараки бахшҳои ҲНИТ дар ноҳияҳои Вахш, Бохтар ва Румии вилояти Хатлон Қиёмиддин Авазовро номад ба вакилӣ дар Маҷлиси намояндагони Маҷлиси Олии ҶТ пешбарӣ кард.