Соли гузашта дар Тоҷикистон беш аз 1 млн. 100 ҳазор метри мураббаъ манзил ба истифода дода шуд, ки нисбат ба нишондиҳандаи соли 2013 ба андозаи 14% зиёдтар аст.

Тавре ба «Азия-Плюс» аз Кумитаи сохтмон ва меъмории назди ҳукумати ҶТ хабар доданд, дар ин давра мактабҳои таҳсилоти умумии нав бо зиёда аз 14 ҳазор ҷойи нишаст, муассисаҳои томактабӣ барои 1,2 ҳазор нафар кӯдакон, дармонгоҳҳои дорои имкони қабули 665 нафар беморон дар як баст мавриди баҳрабардорӣ қарор гирифтанд.

Ба иттилои манбаъ, айни замон нақшаҳои генералии 30 шаҳру навоҳии ҷумҳурӣ таҳия ва мавриди амалисозӣ қарор доранд.

«Нақшаи генералии ноҳияи Темурмалик таҳия ва ба баррасии ҳукумат пешниҳод гардида, нақшаҳои генералии боз 8 шаҳру навоҳӣ дар марҳилаи мувофиқа бо вазорату идораҳои дахлдор қарор доранд», - гуфтанд дар Кумита.

Зимнан зикр гардид, ки корҳои таҳияи нақшаи генералии шаҳру ноҳияҳои Панҷакент, Бохтар, Восеъ, Ҷаббор Расулов, Мурғоб, Варзоб, Ғончӣ, Ашт ва Ҷомӣ пурра ба итмом расида, корҳои таҳияи нақшаҳои генералии шаҳру ноҳияҳои Турсунзода, Мастчоҳ, Бобоҷон Ғафуров ва Зафаробод идома доранд.