Рӯйхати ҳизбии санаи 13-уми декабри соли гузашта аз ҷониби Ҳизби халқии демократии Тоҷикистон пешниҳодшудаи номзадҳо ба вакилӣ аз ҳавзаи ягонаи умумиҷумҳуриявӣ каме ихтисор шуд.

Роҳбари дастгоҳи КМИР Тоҷикистон Абдуманнон Додозода ба «Азия-Плюс» дар ин робита иттилоъ дод, ки ҲХДТ номзадии Қаноатшо Лоиқовро, ки дар рӯйхат таҳти рақами 18 қарор дошт, бозпас хондааст.

«Санаи 2-юми январ Қаноатшо Лоиқов бо фармони президенти Тоҷикистон раиси ноҳияи Рашт таъин карда шуд ва мутобиқи меъёри қонунгузорӣ, як шахс дар як вақт наметавонад ҳам мансаби давлатӣ ва ҳам курсии парлумонро ишғол намояд. Аз ин рӯ, ҲХДТ номзадии ӯро бозпас гирифт», - иброз дошт А.Додозода.

Ёдрас мекунем, ки дар  анҷумани пешазинтихоботии ҲХДТ  бо иштироки пешвои ҳизб, президенти Тоҷикистон Эмомалӣ Раҳмон 28 нафар номзадҳо ба вакилӣ тибқи рӯйхати ҳизбӣ аз ҳавзаи ягонаи умумиҷумҳуриявӣ пешбарӣ шуданд. Номзади ҷавонтарини ҳизб, корманди дастгоҳи иҷроияи президент Юсуф Маҷидӣ 26 сол дошта, дар садри рӯйхат ёвари президент оид ба сиёсати кадрҳо Абдуҷаббори Азиз қарор гирифт.