Шӯрои Ҳизби сотсиал-демократии Тоҷикистон дар ҷаласаи рӯзи 18-уми январ қарор кард, ки санаи 21-уми январро Рӯзи ҳамраъйӣ бо адвокати маҳкумшуда Шуҳрат Қудратов эълон намояд.

Раиси ҲСДТ Раҳматилло Зойиров ба «Азия-Плюс» дар ин робита иттилоъ дод, ки ин қарорро Консорсиуми ҳуқуқии Тоҷикистон ва номзадҳои аз ҷониби ҳизб ба вакилӣ дар палатаи поёнии парлумон пешбаришуда дастгирӣ карданд.

Ба гуфтаи Зойиров, санаи 21-уми январ Шуҳрат Қудратов синни 38-солагиро пур мекунад ва ҳамчунин аз боздошти ӯ расо ним сол сипарӣ мешавад. «Имрӯз ман ҳамчун адвокат аз болои ҳукми суди шаҳри Душанбе нисбати зерҳимояам шикоят мебарам», - гуфт ӯ.

Ёдрас мекунем, ки рӯзи 13-уми январ суди шаҳри Душанбе Шуҳрат Қудратовро ба 9 соли зиндони низомаш шадид  маҳкум кард. Ба ӯ ҳамчунин дар муддати ду сол пас аз озодӣ машғул шудан ба фаъолияти адвокатӣ низ манъ карда шуд.

Раҳматилло Зойиров қаблан изҳор намуда буд, ки зерҳимояаш бо дифоъ аз манфиатҳои Зайд Саидов ва дигар шахсон, ки тафтишоти парвандаи онҳо ба дӯши Агентии зиддифасод вогузор шуда буд, ба ин мақомот халал мерасонд , «вагарна Шуҳрат Қудратов ба озодӣ мебаромад».