Зимни нишасти хабарии имрӯза раиси Кумитаи андози назди ҳукумати ҶТ Нусратулло Давлатзода изҳор намуд, ки бақияи қарзҳо аз андоз дар Тоҷикистон ба санаи 1-уми декабри соли 2014 ҳудуди 585 млн. сомониро ташкил медиҳад.

Ба гуфтаи раиси Кумита, аз пардохти андоз ширкати «Барқи тоҷик» аз ҳама бештар қарздор аст, ки мабалғи қарзи он ба ин сана 135,5 млн. сомониро ташкил дода, бақияи қарзҳои солҳои пешинро низ дар бар мегирад.

«ҶСК «Сангтӯда-1» - 26,1 млн. сомонӣ, ҶСК «Ресандаи Қӯрғонтеппа» - 14,2 млн. сомонӣ, КВД «Алюминсохтмон» - 6,8 млн. сомонӣ, ҶСК «Лаъл» - 6,3 млн. сомонӣ, КВД «Фулузоти нодири Тоҷикистон» - 4,3 млн. сомонӣ ва КМ «Тоҷиказот» - 4,2 сомонӣ аз пардохти андоз қарздоранд», - гуфт ӯ.

Н.Давлатзода таъкид дошт, ки соли гузашта аз ҷониби мақомоти андоз ба маблағи умумии ҳудуди 390 млн. сомонӣ беш аз 2,3 ҳазор қарорҳои рӯёнидани андоз бо тартиботи ғайрисудӣ (маҷбурӣ) қабул шуда, ба ин васила ба буҷети давлатӣ қариб 245 млн. сомонӣ маблағ ворид карда шудааст, ки аз нишондиҳандаи соли гузашта ба миқдори 78 млн. сомонӣ бештар аст.

«Соли гузашта нақшаи ҷамъоварии андоз ва дигар боҷҳо 2,8% барзиёд иҷро шуда, ба ҷойи 6 млрд. 923,5 млн. сомонии пешбинишуда, ба буҷети давлатӣ (бо назардошти андози ғайрибуҷетии иҷтимоӣ) 7 млрд. 117,1 млн. сомонӣ маблағ ворид карда шуд», - афзуд ӯ.