Чанде пеш сафири Тоҷикистон дар Ҷумҳурии Литва Қозидавлат Қоимдодов дар  мулоқоти ҳарсолаи  Президенти  Ҷумҳурии  Литва  Дали Грибаускайте бо сафирони  давлатҳои  хориҷии  муқими  Литва иштирок  намуд.

Бино ба иттилои АМИТ «Ховар» бо истинод ба маълумот аз  сафорати Тоҷикистон  дар  Беларус, дар  ҳошияи  ин  мулоқот  суҳбати  кӯтоҳмуддати  сафири  Тоҷикистон  бо  Президенти Ҷумҳурии Литва  перомуни  масоили  муҳимтарини ҳамкории  дуҷонибаи  Тоҷикистон  ва  Литва баргузор  гардида, сафир,  аз ҷумла, зикр  намудааст, ки  сарфи  назар аз  ҳама  рӯйдодҳои  имрӯзаи  ҷаҳон, бо хоҳишу  мароми президенту  парлумонҳо  ва роҳбарони умури  сиёсати  хориҷӣ  муносибатҳои  дуҷонибаи Тоҷикистону  Литва  мунтазам  рушду  густариш  ёфта, дучори  таъсири  манфии  муносибатҳои  байналмилалӣ  намешаванд.

Ба иттилои манбаъ, рӯзи 20  январ  мулоқоти  сафири  Тоҷикистон бо  муовини  вазири  корҳои  хориҷии    Литва Эндрюс Кривас баргузор  гардида, ҷонибҳо  масоили  мубрами   байналмилалӣ,  мақоми  Тоҷикистону  Литва дар  шароити  пешравиҳои  бузурги  сиёсати  ҷаҳонӣ,  ҳамчунин  вазъу  дурнамои рушди  муносибатҳои  дуҷониба  дар  бахшҳои  ҳамкориро  мавриди  муҳокима  қарор  доданд.

Ҷонибҳо  ба   масоили   ҳамкории тиҷоратию  иқтисодӣ  дахл  карда, бахшҳои энергетика,  саноати  сабук,  кишоварзӣ,  нақлиёту  коммуникатсия  ва  сайёҳиро самтҳои  афзалиятноки  рушди   равобити  дуҷониба маънидод  карданд.

Гуфта мешавад, зимни мулоқоти  сафир  бо вазири  иқтисодиёти Литва Эвалдас  Густас   муҳокимаи  масоили  ҳамкории  тиҷоратию  иқтисодии  байни   ҳар  ду  кишвар  давом дода шуда, зикр  гардидааст, ки  тайи  солҳои  2010 - 2013  муомилоти  моли   байни  Литва  ва  Тоҷикистон  ба 222 млн. 35  ҳазор  доллари  ИМА  расида,  соли  2014,  сарфи назар  аз  бӯҳрони  иқтисодӣ  дар  миқёси  ҷаҳон,  тайи 11  моҳи  соли  2014  муомилоти  моли байни  ҳар  ду  кишвар 180  миллиону 86 ҳазор  доллари  ИМА - ро ташкил  додааст.

Зимнан зикр мегардад, ки дар  ҷараёни  сафари  кории  сафир   ҳамчунин  мулоқоти ӯ бо   ноиби президенти  Конфедератсияи  саноатчиёни  Литва  Гедиминас  Райнис,  раиси Иттифоқи  сайёҳони  кишвар  Алгмантас Ютсевичюс  ва журналистони  Литва  баргузор  шудааст.