Бо қарорҳои Комиссияи марказии интихобот ва раъйпурсӣ (КМИР)-и Тоҷикистон, ба санаи 23 январ 336 нафар шахсони бовариноки номзадҳо ба вакилӣ тибқи рӯйхатҳои ҳизбӣ аз ҳавзаи ягонаи умумиҷумҳуриявӣ расман ба қайд гирифта шуданд.

Роҳбари дастгоҳи КМИР Тоҷикистон Абдуманнон Додозода ба «Азия-Плюс» дар ин робита иттилоъ дод, ки аз ҲНИТ – 135, ҲХДТ – 121, ҲАТ – 29, ҲКТ – 25, ҲСТ – 18 ва ҲИИТ – 18 нафар шахсони боваринок сабти ном шуданд. «Ҳизби демократ ба КМИР ягон шахси боваринок барои сабти расмиро пешниҳод накард», - иброз дошт номбурда.

Хотиррасон шуд, ки барои бақайдгирии рӯйхати ҳизбӣ ва шахсони боваринок аз Ҳизби сотсиал-демократии Тоҷикистон то 9-уми феврал ҳоло муҳлат боқӣ мемонад.

Ёдрас мекунем, ки чанд рӯз қабл Шӯрои сиёсии ҲСДТ ба нишони эътироз ба ҳукми содиршуда нисбати адвокат Шуҳрат Қудратов, тасмим гирифт, ки муваққатан аз иштирок дар маъракаи интихоботи парлумонӣ даст мекашад.