Дар робита ба шарҳи паёми ироашудаи президент ба парлумон муовини раиси Ҳизби сотсиал-демократии Тоҷикистон (ҲСДТ) Шокирҷон Ҳакимов изҳор намуд, ки аз нигоҳи мундариҷаву муҳтаво он аз паёмҳои пешин фарқ надошт.

Ӯ таъкид кард, ки ин дафъа ҳам намояндагони ҲСДТ бо сабабҳои маълум ба ин чорабинӣ даъват карда нашуданд.

«Ба фикри ман, мувофиқи мақсад мебуд, агар ба масоили муҳимияти интихоботи қарибулвуқӯъ, тадбирҳо ҷиҳати анҷоми сохтмони нерӯгоҳи Роғун ва беҳбуди муносибатҳо бо кишварҳои ҷудогонаи минтақа ва ниҳодҳои байнулмилалии молиявӣ ҳамчун шарти стратегии рушди устувор бояд бештар таваҷҷуҳ зоҳир мешуд», - мегӯяд Ҳакимов.

Муовини раиси ҲСДТ ҳамчунин қайд кард, ки ба андешаи ӯ, масъалаҳои  оқибатҳои манфии коррупсия, маҳалгароӣ, «хешутаборчигӣ» ва зуҳуроти дигари манфии ҷомеа, ки ба болоравии нуфузи кишвар дар арсаи байнулмилалӣ ва маҳсулнокии фаъолияти ҳукумат монеъа эҷод мекунанд, низ ба таври бояду шояд мавриди баррасӣ қарор нагирифтанд.

«Ман пешниҳод мекардам, ки минбаъд вақти ироаи паёми президент то 40 дақиқа маҳдуд гардида, ба на бештар аз ду масъалаи сиёсати дохилӣ ва ду мушкилоти дорои аҳамияти байнулмилалӣ бештар таваҷҷуҳ зоҳир шавад», - афзуд муовини раиси ҲСДТ.