Вазири нақлиёти Тоҷикистон Хайрулло Асозода зимни нишасти хабарӣ иттилоъ дод, ки айни замон дар соҳаи нақлиёти ҷумҳурӣ амалисозии лоиҳаҳои сармоягузорӣ ба маблағи умумии беш аз 483 млн. доллари ИМА идома дорад.

Ба гуфтаи ӯ, ахири соли равон ба итмом расидани корҳои таъмиру азнавсозӣ дар қитъаи роҳи мошингарди Шӯрообод – Шоҳон, Кӯлоб – Қалъаи Хумб, азнавсозии роҳи автомобилгарди Душанбе – марзи Ӯзбекистон (аз дарвозаҳои ғарбии пойтахт то сарҳади Ӯзбекистон) ва корҳои таҳияи лоиҳаи арзёбии фанниву иқтисодии корҳои таъмир ва таҷдиди роҳи мошингарди Лаби Ҷар – Тавилдара дар назар аст.

Вазири нақлиёт қайд кард, ки соли гузашта корҳои таъмиру азнавсозӣ дар 5 иншоот, аз ҷумла сохтмони роҳи Шоҳон – Зигар (марҳилаи 3-юм), азнавсозии роҳи Данғара – Кангурт, роҳ ба самти нақби «Озодӣ» (Шар-Шар), сохтмони терминал дар Фурудгоҳи байнулмилалии Душанбе ва ҳамчунин амалисозии лоиҳаи дастрас намудани техника ва механизмҳо барои дар ҳолати коршоям нигоҳ доштани роҳҳо ба охир расид, ки маблағи умумии лоиҳаҳои зикршуда 115,6 млн. доллари ИМА-ро ташкил додаанд.

«Татбиқи ин лоиҳаҳо иловатан ба таъмиру таҷдиди 47,9 километр роҳҳои автомобилгард бо 5 пул (купрӯк), сохтмони терминали муосири хизматгузорӣ дар фурудгоҳи пойтахт ва гузаштан ба зербинои навтарини хизматгузории расмиёти марзӣ имкони мусоид фароҳам овард», - иброз дошт Асозода.

Зимнан зикр гардид, ки дар чаҳорчӯби амалисозии лоиҳа оид ба дастрас намудани техника ва механизмҳо барои дар ҳолати коршоям нигоҳ доштани роҳҳо сохтмони ду корхонаи асфалтбарорӣ ба анҷом расонида шуд.