Вазири мудофиаи Тоҷикистон генерал-лейтенант Шералӣ Мирзо имрӯз ҳайати низомии Русия таҳти сарварии муовини вазири мудофиаи Русия Анатолий Антоновро, ки бо сафари серӯза ба Душанбе ташриф оварданд, ба ҳузур пазируфт.

Котиби матбуотии Вазорати мудофиаи ҶТ Фаридун Маҳмадалиев ба «Азия-Плюс» дар ин робита иттилоъ дод, ки зимни мулоқоти ҳайатҳои низомии ҷонибҳо ба масъалахои амалисозии тавофуқоти қаблан ҳосилшуда миёни кишварҳо оид ба ҳамкориҳои низомиву техникӣ таваҷҷуҳи хосса зоҳир шуд. «Дар ҷараёни гуфтушунидҳои минбаъда ҷонибҳо масъалаи расонидани кумаки низомиву техникии Русия ба Тоҷикистонро батафсил таҳлилу баррасӣ мекунанд», - гуфт ӯ.

Бино ба иттилои як манбаъ аз ҳукумати Тоҷикистон, дар назар аст, ки ҳайати низомии Русия таҳти сарварии Анатолий Антоновро президенти Тоҷикистон Эмомалӣ Раҳмон ба ҳузур мепазирад.

Қобили зикр аст, ки зимни сафар ба Тоҷикистон ҳайати ҳарбии Русия аз қисмҳои низомии ҷудогонаи Артиши миллии Тоҷикистон ва пойгоҳи низомии 2101-уми Русия дар Тоҷикистон боздид мекунад.