Рӯзи 29 январи соли 2015 дар пешманзари баргузории интихоботҳои парлумонӣ дар бинои Бундестаги Олмон мулоқоти сафири Тоҷикистон дар Олмон Маликшо Неъматов бо раиси Гурӯҳи парлумонии Олмону Осиёи Марказӣ Манфред Грунд ва аъзоёни ин гурӯҳ баргузор гардид.

Бино ба иттилои Вазорати корҳои хориҷии ҶТ, зимни сӯҳбат бештар дар атрофи масъалаҳои тақвияти робитаҳои байнипарлумонӣ, зарурати рушди ҳамкориҳои Тоҷикистону Олмон баъди хурӯҷи Қувваҳои эътилоф аз Афғонистон, табодули таҷриба ва омӯзиши мутахассисон табодули назар сурат гирифтанд.

Гуфта мешавад, Манферд Грунд изҳор доштааст, ки Тоҷикистон ҳамчун кишвари дорои сарватҳои кашфношуда бо назардошти мавқеи ҷуғрофии худ, инчунин нақшаҳои Ҳукумати кишвар дар самти беҳтарсозии инфрасохторҳои байналмилалӣ имконоти хуб барои ҳамкориҳо бо кишварҳои Аврупоро дорад.

Зимнан зикр мегардад, ки баргузор гардидани сӯҳбату мулоқотҳои судманд дар тӯли соли ҷорӣ, ҳамчунин сафарҳои мутақобилаи кории гурӯҳи байнипарлумонии Олмон ва Осиёи Марказӣ дар соли 2016  ба нақша гирифта шудааст.