Олимони тоҷик ояндаи наздик як маркази аёнии пажуҳишӣ оид ба озмоиши таҷрибахо дар соҳаи энергеткиаи ғайримаъмулиро таъсис доданианд.

Директори Муассисаи давлатии илмии «Маркази рушди инноватсионии илм ва технологияҳои нав»-и Академияи илмҳои Тоҷикистон Мамадшо Илолов ба «Азия-Плюс» дар ин робита иттилоъ дод, ки бунёди пажуҳишгоҳи аёнӣ, ки дар он нерӯгоҳи барқии ҳамгиро низ насб мешавад, дар дараи Ромит, 30 километрии шарқи пойтахт ба нақша гирифта шудааст.

Ба гуфтаи ӯ, дар ин марказ панелҳои офтобӣ, нерӯгоҳҳои барқии шамолӣ (бодӣ) ва дастгоҳҳои генераторҳои биогазӣ насб гардида, пойгоҳи обуҳавошиносӣ низ амал хоҳад кард, то ки обуҳаворо пешгӯӣ намуда, мутаносибан истеҳсоли энергия ба чанд моҳи минбаъдаро тарҳрезӣ намуд.

«Мо бо Академия илмҳо ин масъаларо мувофиқа намуда, аз нақшаҳоямон ҳукумат ҳам огаҳ аст. Дар ин самт бо шариконамон аз Чину Аврупо низ ҳамкорӣ дорем. Ҳампешагони аврупоии мо оид ба истифодаи сарчашмаҳои гуногуни энергияи барқароршаванда аз таҷрибаи кофӣ бархӯрдоранд», - иброз дошт ӯ.

Мамадшо Илолов бар ин назар аст, ки Тоҷикистон бояд ҳарчи зудтар ба омӯзишу истифода ва сарфаи энергияи истеҳсолшуда бар асоси захираҳои офтобу бод ва дигар захираҳои биогеотермалӣ оғоз намояд.