Мухолифони ҳукумати Ӯзбекистон хабар медиҳанд, ки президенти амалкунандаи кишвар Ислом Каримов дар ҳолати беҳушӣ (кома) қарор дорад.

Бино ба иттилои фаъолони Ӯзбекистон халқ ҳаракати (Ҳаракати мардумии Ӯзбекистон) бо истинод ба сарчашмаҳои худӣ дар ҳукумати ин кишвар, рӯзи чоршанбе, 28-уми январ вазъи солимии сарвари давлати Ӯзбекистон баякборагӣ хеле бад шудааст.

«Тахминан соатҳои 20-30 дақиқа, ҳангоми хӯроки шомгоҳӣ дар қароргоҳи «Кӯксарой» президент Ислом Каримов беҳуш шуда, ҳайати кормандони тиббии қароргоҳ таъҷилан ба ӯ ёрӣ расонидаанд. Ғайр аз ин дигар мутахассисон ҳам ба Дурман даъват шуда, аммо то ҳол ба онҳо муясссар нашудааст, ки президентро ба ҳуш оранд. Ислом Каримов рӯзи 29 январ низ дар ҳолати беҳушӣ (кома) қарор доштааст», - хабар дода мешавад дар сомонаи расмии Ӯзбекистон халқ ҳаракати.

Гуфта мешавад, субҳи рӯзи панҷшанбе раиси Хадамоти амнияти миллӣ Рустам Иноятов, нахуствазири кишвар Шавкат Мирзиёев ва дигар аъзои ҳукумати наздик ба оилаи Каримов ба қароргоҳ омада, вале ҳанӯз аз натиҷаҳои мулоқоту гуфтушунидҳои онҳо маълумот дастрас нест.

Зимнан зикр мегардад, ки тайи ду соли ахир ин маротибаи дуюм аст, ки президенти Ӯзбекистон беҳуш шуда, муваққатан ба кор намебарояд.

Дар ҳамин ҳол, рӯзи ҷумъаи ҳафтаи гузашта, 30 январ президенти Ӯзбекистон Ислом Каримов ба синни 77-солагӣ қадам ниҳод.