Ҳизби халқии демократии Тоҷикистон (ҲХДТ) бо теъдоди 40 ҳазор нусха лавҳаҳои пешазинтихоботӣ ва дигар маводи таблиғотӣ нашр кард.

Усмон Солеҳ, мудири шӯъбаи таблиғот, иттилоот ва матбуоти Дастгоҳи КИМ ҲХДТ ба «Азия-Плюс» дар ин робита иттилоъ дод, ки чор навъи маводи таблиғотӣ, аз ҷумла лавҳаҳо бо барномаи пешазинтихоботии ҲХДТ, лавҳаҳо бо аксҳои 27 нафар номзадҳо тибқи рӯйхати ҳизбӣ, лавҳа бо акси варақаи овоздиҳӣ ба ҷонибдории ҳизб ва ҳамчунин тақвими соли 2015 бо даъвати раъйдиҳӣ ба ҷонибдории ҲХДТ ба чоп расидаанд.

«Агар маводи чопшуда барои паҳнкунӣ дар саросари кишвар кифоя накунад, ҳизб боз нусхаҳои иловагӣ ба нашр мерасонад», - иброз дошт ӯ.

Дар робита ба манъи ҷойгиркунии лавҳаҳои пешазинтихоботии Ҳизби наҳзати исломии Тоҷикистон дар пойтахт, номбурда зикр кард, ки ҲХДТ низ чунин маводро дар тамоми шаҳрҳои бузурги кишвар ҷойгир карданӣ буд. «Аммо агар ин кор тибқи қонунгузорӣ манъ шуда бошад, мо маҷбурем, ки аз ин нақшаҳои худ даст кашем», - афзуд Усмон Солеҳ.