- Муовини аввали вазири корҳои хориҷии Қазоқистон Рапил Жошибоев изҳор намуд, ки таъсиси консорсиуми минтақавии обиву энергетикӣ ба ҳалли мушкилоти истифодаи оқилонаи захираҳои обӣ бо назардошти манфиатҳои ҳамаи кишварҳои минтақаи Осиёи Марказӣ имкон фароҳам месозад, - иттилоъ додааст хабарнигори BNews.kz дар Душанбе.

«Қазоқистон ба баррасии пешниҳодоти ҷониби Тоҷикистон оид ба иҷрои корҳои пудратӣ дар доираи лоиҳаи сохтмони нерӯгоҳи барқи обии Роғун омода аст ва таъсиси консорсиуми зикршударо мувофиқи мақсад мешуморад», - иброз доштааст ӯ зимни сафар ба пойтахти Тоҷикистон.

Муовини вазир бори дигар Тоҷикистонро ба ҳамроҳшавӣ ба хартияи «Пули сабз» даъват кард, ки дар Конфронси СММ оид ба рушди устувор маъқул шуморида шуда, ҳадафҳои он бо вазифаҳои асосии барнома бо ташаббуси раҳбарияти Тоҷикистон оид ба истифодаи гидроэнергетикаи аз нигоҳи экологӣ тоза, ҳифзи муҳити зист ва корбарии технологияҳои нав созгор аст.

Жошибоев омодагии мусоидат ба Тоҷикистон ба ҳамроҳшавӣ ба Созмони исломии амнияти озуқувориро тасдиқ намуд, ки аз рӯи натиҷаҳои иҷлосияи 38-уми Шӯрои вазирони корҳои хориҷии Созмони ҳамкории исломӣ дар Остона (28-30 июни соли 2011) қабул шуда буд. Ғайр аз ин, ӯ иттилоъ дод, ки Қазоқистон ба пардохти аъзоҳаққии Тоҷикистон ба ин созмон дар муддати се сол низ омода аст.

Қобили зикр аст, ки Жошибоев ҷиҳати баррасии дурнамои ҳамкориҳои дуҷониба ва масъалаҳои омодагӣ ба намоишгоҳи «ЭКСПО», ки соли 2017 дар Остона доир мегардад, ба Душанбе ташриф овард. Зимни сафар ӯ бо муовини аввали нахуствазири Тоҷикистон Давлаталӣ Саид, муовини вазири корҳои хориҷии ҶТ Парвиз Давлатзода ва раиси Палатаи савдо ва саноати Тоҷикистон Шариф Саид дидору гуфтушунид кард.