Дар ноҳияи Данғара 11 номзади ноҳиявии ҳизб, аз ҷумла муаллими раиси ҷумҳури кишвар ҷиҳати ноодилона сабти ном накардани ишон ба Суди ноҳияи Данғара муроҷиат карданд.

Тибқи иттилоъи сомонаи расмии ҲНИТ бо истинод ба масъулини бахши ҳизб дар ноҳияи Данғара, 11 номзади ноҳиявии ҳизб дар ин ноҳия, ки ба хотири нагузаштан аз имтиҳони забони давлатӣ сабти ном нашуда буданд, ба хотири таҷдиди назар дар ҳукми Комиссияи интихоботӣ оиди сабти ном нашудани онҳо ба суд муроҷиат карданд.

Гуфта мешавад, аз ҷумлаи 11 номзаде, ки ба суд муроҷиат карданд, Камолов Хол, муаллими раиси ҷумҳури кишвар ҳам шомил мебошад.

Зимнан зикр мегардад, ки то ба имрӯз 3 номзади вилоятӣ ва 11 номзади ноҳиявии ҲНИТ дар ноҳияи Данғара сабти ном шуданд.

Ёдрас мекунем, ки рӯзи 29 январ дар ноҳияи Данғара 22 номзади Ҳизби наҳзати исломии Тоҷикистон дар имтиҳони забон, ки аз тарафи ҳавзаи маҳаллии интихобот бо ширкати мутахассисони забон аз шуъбаи маорифи ноҳия баргузор гардид, ширкат карданд ва аз ҷумлаи 22 номзад 10-тои онҳо бо шумули Камолов Хол, муаллими Эмомалӣ Раҳмон ноком шуданд.